पानीसंगै.......

पानीसंगै.......

पानीसंगै आफ्नो मन पनि बगायो भने 

कहाँ कहाँ पुगिने होला

कसलाई भेटिने होला

एकपल्ट पानी भैजान मन भएको छ

थोपा थोपा भएर

तप्प चुहिन मन भएको छ

फोका फोका भएर

भित्रैबाट गुडुल्किदै उठ्दै

प्वाट्ट फुट्न मन भएको छ

निकै रमाइलो छ बयेली खेल्न

भुमरी भएर घुम्दै घुम्दै

स्वाट्ट भाग्न मन भएको छ

साउने भेलले रंग हरु थपिदिँदा

बच्चाहरुले झैं गोटी थुपार्दै

ठुल्ठुला पत्थरहरुसंग

जिद्दी लडाउन मन भएको छ

कुरी बस्नु त्यति मजा नहोला

अक्कर किनार पत्थर पहाड

छाम्दै दगुर्न मन भएको छ

रुकीइयो भने त बाफ भइन्छ

अल्झिईयो भने त दुषित भईन्छ

बरु कुहिरो बादल भएर

माथि पुग्न रहर भएको छ

बतासको काँधमा सबार भएर

आकाश आकाश कुद्न रहर भएको छ

चिसीइनु कठाँग्रिनु त मन होइन

उज्याला मोतिका दाना बनेर

पहाडहरु माथि राश लाउनु

चौर मैदानमा च्यादर बिछयाउनु

एउटा साहसको कुरा हो

एउटा बिजयको उन्माद हो

बर्षात भएर छतमा, रुखमा

बिजुलीका खम्बाहरुमा

अन्तर कुन्तरबाट हेर्दै आउनु

बलेंसी चुहाउँदै गीत गाउनु

साँच्चिकै ठूलो इच्छा भएको छ

भर्खर खनेको बारीभित्र

आत्मियताको न्यानो समेटेर

रुखका जराबाट माथि घुसेर

नशा नशा छाम्न मन भएको छ

एकपल्ट पानी भएर

गरा गरा चाहार्न मन भएको छ

आली आली फड्का मार्न मन भएको छ

छहरा भएर पहराहरुबाट

कहालिंदै खस्न त गाह्रै पर्ला

मैदानसम्मको आफ्नो यात्रामा

आफुलाई समर्पण गर्न मन भएको छ

एकपल्ट पानी भैजान मन भएको छ

कर्कलाको पातमा ध्यानमग्न बसेर

घामसंगै बिलाई जान मन भएको छ |