पत्थरको कहानी...................
पत्थरको कहानी लेख्न
आफैं पत्थर भएर हेर्नुपर्छ
तिम्रा भित्ताहरुमा टकराउन आयो भनेर
पत्थरलाई उपद्रबी नसम्झनु
तिम्रा पाउहरुमा ठेस लगायो भनेर
पत्थरलाई धुलो पार्ने छिनो नचलाउनु
तिम्रो घर पनि पत्थरहरुकै जगमाथि उभिएको छ
तिम्रो खेत पनि पत्थरकै सिरानीमा अडिएको छ
पत्थरहरुप्रति निष्ठुर नहुनु
पहिरो – पत्थरको बाध्यता
बगर – पत्थरको अनिच्छा
पत्थरले नचाहेरै पनि
धरहरा हरु भत्केका छन्
धरान उदयपुर चर्केका छन्
पत्थरको मर्म बुझ्न
आफू पत्थर बनेर भोग्नुपर्छ
पत्थर सधैं शालिग्राम र शिवलिंग भएर पुजिएको छैन
पत्थर अचानो र लोहोरो पनि बनेको छ
भारहरु सहेर पिसिएको पनि छ
आफ्नै अस्तित्वको ठेगान नहुँदासम्म
बाँधहरु बनेर अडिएको छ
साँधहरु बनेर उभिएको छ
पत्थरका व्यथालाई भुलेर
सस्ता कथाहरु नलेख्नु
पत्थरको पनि आफ्नो
धैर्य हुन्छ भन्ने बझ्नु
कम्पन - पत्थरको चरम असन्तुष्टि
ज्वलन पत्थरको चरम उत्पीडन
पत्थरलाई पनि तापले पोल्छ भन्ने नबिर्सनु
पत्थरलाई पनि चापले दुख्छ भन्ने नभुल्नु
मोति पनि त पत्थरले मुटुभित्र साँचेको हुन्छ
ज्योति पनि त पत्थरकै गर्भ भित्र राखेको हुन्छ
पत्थर पृथ्वी हो
तिम्रा गोरेटा हरुमा बिछ्याईने ढुंगा मात्रै होइन
पत्थर गोरख काली र सगरमाथा पनि हो
पत्थरको दिल नदुखाउ
पत्थर भीमसेन र बज्र पनि हो
पत्थरको नियति बुझ्न
आफैं पत्थर भएर सम्झनुपर्छ
पत्थरको कहानी लेख्न
आफैं पत्थर भएर हेर्नुपर्छ |
No comments:
Post a Comment